The Last Supper, Holy Thursday at St. Mary's Cathedral, Kalaymyo ( 28.3.2024)

Siangtho Nili Ni (Holy Thursday) ni-in St. Mary Cathedral ah Kalay Diocese hongcing hongkem His Excellency Bishop Felix leh Siampi (9) in Missa Biakpiakna noptak in bawlkhawm in thuzuite zong tul val bang kikhawm thei uh hi.
Hih Biakpiakna pen Topa Jesu hun lai a mah bangin a kibawl a hih manin Rector of St. Mary's Cathedral Msgr. John Khuppu ii vaihawm siamna tawh Khe kisilsak na ah Nungzuipi (12) te tangin Upa (12) ki teelkhia in tua te in zong Uniform silhin a puan tung uh ah Nungzuipi (12) te min teng mah gelh pah uh ahih manun Topa Jesu hun lai aa thupiangte hong phawk sak semsem hi.
Missa hun sungin Msgr. John Khup in Khe kisilsakna ii thupitna, Sia leh nautang te kizop zia, ki pumkhat na thu te leh ih Zo ngeina sangin Christian upna ih thupit sak zawk den ding a kisapna thu te hong gen hi.
Tua banah Topa Jesu in Siangtho nili ni-in Siangtho pumpi a hong bawlsak na, Sacramentu te a hong bawlsak na, Siampi za a hongpiak na thu te leh Siangtho nili ni-in apiang thu te abanban in hilhcian na hong nei ahih manin tua hun lai aa apiang thu te ih mitkha ah hong muthei sak hi.
Tua khitteh Siadawpa in Topa Jesu mah bangin a kawngah diak vialin Upa te khe silsak in dial tawh a nulkeu sak khitteh a khe nap sak hi. Tua khitteh Missa Biakpiakna te abanban in ki zom to hi.
Tu ni-in hih Biakpiakna tawh kisai-in a lunglut pawl dangte khatin "ko pawl ah hi bangin kibawl ngeilo hi. Laisiangtho sungah hi bang thu te a om lam zong thei kha ngei keng, ka Sia te un hong gen ngeilo hi" ci-in a tha ngahna thu kei tungah hong gen khia hi.
Hi bangin Pawi ih bawlna te Pawl dang ten hong eng mahmah hi cih phawk ciat ni. Tua ahih manin Catholic Siampi te nasep a sem nuam Siampi a kineih khem Catholic Siampi te tawh a ki telkhial thei dingin Puantual kang leh Roman Collor puan a silh Siampi (အတု) pawlkhat zong kum 2020 kim pawl pan ei Zomi te sungah a om lam zong phawk ciat ni.
Tua te pen Nungzuipi te tawh a kizom paisuak Pawlpi a hih loh lam phawkin (အစစ် leh အတု) a ki lam danna thu mite tungah hilhcianna ih piak zawh nangin hanciam ciat ni.
Tuni aa ih Pawi bawl in Nungzuipi te tawh a ki zom paisuak Pawlpi ih hihna thu limtak in hong lak pha mahmah hi.
Tua ahih manin ih Pawlpi honghilh upna thuthuk te limtak in ih kan telin midang te tungah hilhcianna ih piak zawh nang hanciam ciat ni.

By- Fr. Joseph Zo Mung